Мәшһүр шапағаты мен тылсымы Абаттанған Ата қонысы

    Есімі елге, халқына ХХ ғасырдың бас кезінен әйгілі, дана сөздері мен дара қасиеттері талай білімпазды таң қалдырған әулие, тарихшы, болжауы босқа кетпеген көреген, ақындығы ақылмен, оймен, саясатпен астасқан көріпкел, ем қондырған емші, аузынан шаққан сөзі дуалы Мәшһүр Жүсіп тылсымы туралы халық арасында аңызға бергісіз ақиқат әңгімелер көп-ақ. Бұл туралы Мәшһүр немерелері Төлеубай, Сүйіндік, Фазыл, шөберелері Абай, Нартай, Ертай, Әсет естелік кітаптары мен Сәрсенбі Дәуітов зерттеулерінде және жазушы Дихан Әбіловтың сипаттауында тиянақты жазылған. Ал біздің күнделікті жазып отырған (күнделік жазба) баяндауымыз бен әңгімеміз Мәшһүр ата туралы құлақпен естіп, көзбен көрген оқиғаларды, ғанибеттерді және ғұламамен замандас болған кейбір тарихи тұлғалар туралы деректерін топшылау, сол қалпында артық әсірелеусіз жазу. Сол арқылы байырғы қазақ бабадан келе жатқан ұрпақтар сабақтастығын насихаттау, Мәшһүр атаның ағартушылық, адамгершілік, бағдарымен, бағытымен, адам біліп, танып болмас, ішкі тылсым табиғатын, болмысын, дертке дауа бола білген демін, ішірткі жазып берген емін тек бір жаратқан Алла білер қасиеттерін деректі әңгімелер арқылы таныстыру, табыстыру.